Criza a vaccinurlor, acata calea ti andridzeari ?

Leyla Cheamil, 27.04.2017, 13:05

Aşi că ambodyiurli isira tru migdani una s-una. Tru 38 di giudeţe dit ateali 41 s-nuregistrara, până tora, aproapea 4900 di cazuri di rujeolă. Cama di 20 di cilimean’i murira di furn’ia a aistei langoari şi a complicaţiilor ti isira tru videală. Tora ma nainti, premierlu Sorin Grindianu avu una andamusi cu ministrul a Sănătatil’ei, Florian Bodog, tru arada a curi apufusira ca Executivlu s-ndreagă un plan multianual di achiziţii. Va s-hiba discl’isa deapoa una nauă structură, cari s-aibă ngatan ca una criză a serurilor di imunizare, ca aesta di tora, s-nu s-faca s-alta oara. Ma multi tranşe dit serurile hexavalent şi tetravalent fura ampartati tru vasilie şi va s-hiba pitricuti ntraoara şi ateali 10 n’il’i di doze di vaccin contra a rujeolal’ei, aflati la distribuitori după ti s-apufusi curmarea a exporturlor.

Ministrul tra Sănătati, Florian Bodog: Aprukeaiu asiguripseri că, tru ahurhita a meslui ti yini, aestu vaccin va s-intra tru vasilie. Tutunaoara, identificam un numir di 10.000 di doze, cari suntu tru vasilie şi cari lipsea tra s-nkiseasca la exportu intracomunitar. Aesti doze suntu ambudyiusiti şi nkisim una procedură tra s-li ancuparam.

Tru atea ti mutreaşti dozele di vaccin contra a hepatital’ei B agiumta dit Norvegia, ministrul Florian Bodog spusi ca aesti lipseasti s-acata calea a unal’ei autorizare. El cundil’e că, toradioara, easti una problemă ligată di concentraţia a aistui vaccin andicra di aţea ti s-ufiliseasti pi piaţa românească.

Până tora, numirlu di doze agiumti la yiatarl’I di familie easti la ma puţan di giumitate andicra di ananghiseari, spusi yeaturlu Raluca Ghionaru, mintita tru una campanie tru favoarea a imunizaril’ei: Ş-mini, ama şi sotl’I a mei aprukem, stămâna ti tricu, anamisa di 20 şi 25% dit ananghea di hexavalent, ti u caftam di la direcţiile sanitare. Aprukem ma puţan di giumitate dit ananghea di tetravalent şi nu aprukem niti una doză di vaccin rujeolă-rubeolă-oreion, tru condiţiile tru cari him nică tru epidemie.

Tru nascanti cazuri, catastisea agiumsi s-hiba cama slabă şi di furn’ia că nascanta părinţa nu vrura tra să-şi imunizeadza cilimean’il’i. Ti atea, yeatarl’I di familie featira timbihi tra ananghea mutrindalui una campanii di informare şi dukimaseari tra hairili, ama şi piricl’iurli a vaccinaril’ei. Yeatarl’I di familie îl’i candasescu părinţal’i s-aibă pistusinea tru vaccinuri şi hairlatica a lor, ti atea ca aesti seruri îl’i aveagl’e pi atel’I n’it di langori greali. El’i fac timbihi că scădearea a ratal’ei di vaccinare poati s-duca , cu kirolu, la criştearea a incidenţal’ei tra nascanti langori.

Autor: Leyla Cheamil

Armanipsearea: Tascu Lala