Crişteri şi n’icşurări di pâhadz
Ca tu cathi an şi ca tu alti vâsâlii europeani, dzua di 1 di Alunar easti isa, tu Românii, cu unâ alâxeari a pâhadzlor. Aşi, român’ii lipseaşti s-ascoatâ cu 2,5% dit gepi ma mulţâ pâradz ti pâltearea a facturâl’ei la gazi naturali. Furn’iea aliştei crişteari ari ligâturâ cu criştearea pâhălui a gazilor dit importu, cari va s-agiungâ la 10% dit consum. Ti mutreari, ama, că baia casi dit Românii pâlteau, tu inşita a anlui ţi tricu, nai ma n’iţi pâhadz la gazili naturali dit Uniunea Europeanâ.
Roxana Vasile, 01.07.2014, 11:20
Pi prinţiplu unâ araţi, unâ caldâ”, andicra di factura la gazi, aţşea la energia electricâ va s-scadâ cu 2,6 proţenti. Tut di la 1 di Alunar, salarlu minim pi icunumii va s-creascâ di la 850 la 900 di lei. Va s-hârseascâ di aestâ meatrâ 960 di n’ii di român’i. Pi di unâ parti, unâoarâ cu unâ ahtari crişteari, şi amendziâli va s-creascâ, un punctu di amendâ hiindalui 10% dit cât faţi salarulu minim brut pi icunumii.
Pi di altâ parti, cu maşi 200 di euro, român’ii s-aflâ pi aţel di pinultim loc tu Europa, andicra di francezi, cari nu pot s-aibâ pi mesu ma pţân di 1.500 di euro brut. Român’ii suntu campion’i europen’i şi la numirlu şi pâhălu a taxilor. Em, easti un zbor bun că, dit prota dzuâ a meslui Alunar, ies dit legislaţii 92 di taxi icâ tarifi di turlii parafiscalâ, ti cari Executivlu ş-luă borgea s-li ascoatâ. Aestâ proţedurâ ahurhi dit meslu Mai, cându, dupu apruchiearea tu Guvernu a unâl’ei apofasi şi a unâl’ei ordonanţâ di urgenţâ, furâ scoasi 10 taxi şi tarifi ţi earau paranom, alti 17 hiindalor bâgati deadun. Alanti, pânâ la 92, furâ n’icşurati icâ scoasi prit ordin di ministru icâ a prezidenţâlor di instituţii cu borgi di turlii fiscalâ.
Prit taxili ascoasi easti şi aţea mutrinda paşaportul temporar, aţeali mutrinda consultanţa icâ darea di dati statistiţi mutrinda firmi icâ alti tarifi di avizi, licenţi ama şi calea libirâ la nâscânti documenti. Catandisea bugetarâ – estimatâ cathi an — aluştor meatri treaţi di 900 di n’ii di lei. Lipseaşti vidzutâ, ama, şi ghineaţa ţi yini unâoarâ cu scutearea a pâhălui di administrari a taxilor şi tarifilor parafiscali. Aţea dit soni meatrâ mutrinda alâxearea a pâhadzlor mutreaşti serviţiili di roaming, cari va s-hibâ cama n’iţ di la 2 di Alunar. Român’ii şi ufilisescu tilifoanili mobili va s-pâlteascâ cu 20% pânâ la 55% mai pţân cu agiutorlu bâgarâl’ei tu practico a nâscântui nom european. Nai ma mărli scâderi di pâhadz suntu şi ti ufilisearea a serviţiilor di dati, maxus ti acţeslu la internet.
