Congreslu extraordinar a PSD
Premierlu Viorica Dăncilă agiumsi sâmbătă prezidintu executiv a PSD, hiinda votată di 2.880 di delegaţ ţi eara vinit la Congreslu extraordinar a PSD. S-nregistrara 939 di voturi “contra”. Tra idyea ipotisi, Ecaterina Andronescu aminta 541 di voturi “tra”, “contra hiinda nregistrati 3.278 di voturi. Atel di ma ninti ministru a Sănătatil’ei Nicolae Bănicioiu aminta 292 tra şi 3.527 contra.
Eugen Cojocariu, 12.03.2018, 09:46
Atelʹi di ma nintitii miniştri Nicolae Bănicioiu şi Ecaterina Andronescu, candidaţ ti ipotisea di prezidentu executiv a PSD, lʹi-aflara cabati organizatorlʹi a Congreslui că nu avura cabilea ta s-greasca dinintea a delegaţilor nainti tra s-da votlu şi fudzira ditu sala.
Marian Neacşu aminta ipotisea di secretar gheneral cu 3.063 di voturi tra, contra fura 668 di voturi. Tru arada a Congreslui extraordinar fura validaţ viteprezidentalʹi ti ateali 8 reghiuni di dezvoltari, câti una mulʹeari şi un bărbat tra cafi una reghiuni.
Delegaţlʹi la Congreslu extraordinar a PSD votara tru unanimitati tru ahurhearea a dezbaterlor tra 5 convenţii naţionale: tra adoptarea monedalʹei euro până tru 2024, tra prezidentil’ea a Consiliului UE, tra cultură, tra egalitatea di ghen România paritară şi Convenţia naţională România 2040.
Prezidintul a PSD, Liviu Dragnea, alʹi cafta a, ministrului di Externe Teodor Meleşcanu s-adară, ntraoara, una pripuniri tra ipotisea di ambasador ali Românie tru Israel. El declara, la Congreslu extraordinar a PSD, că “easti ti niaprucheari s-avem ma multu di un an di dzali si s-nu avem ambasador tru aestă vasilie di mari simasie”. “Voi s-ufilisimu cu mintimineaţă disclʹidearea ti easti tut ma mari di partea a cratlui Isrel andicra di România”, spusi Dragnea.
Liviu Dragnea, declara că România ari cabilea tra s-da tu aestă veară agiutor financiar tra oaminʹilʹi cu amintatiti nʹiţ dit Ripublica Moldova, cundilʹindalui că subiectul va s-hiba acaţat tru moeabeti tru arada a coaliţiilʹei şi a Guvernului. Tutunaoară, el cundilʹe că vasilia a noastră ma largu va u agită Ripublica Moldova tra integrarea tru Uniunea Europeană.
România va lu-anvartuseadză parteneriatlu strategic cu SUA, dezvoltândalui şi cumata economică, declara Dragnea. Vrem tutunaoara s-avem relaţii spetiali, una coopearare spetială tru dumenea economica şi tru industria di apărari cu Ghirmania, Franţa şi Marea Britanie. Lipseasti s-nchisimu cu curayiu, cu pragmatismu şi cu continuitati babageanlu potenţial di dezvoltari ti lu-avem tru una relaţie di coopearari cu China, adăvga liderlu PSD, cari cundilʹe şi tra una ma bună coopearare cu vasiliili dit reghiuni. Voi s-anvartusimu şi s-cristemu un sistem di coopearari economică şi nu masi, cu Vargaria, Sarbia, Ungaria şi Ripublica Moldova, spusi Liviu Dragnea.
Cama di 100 di oaminʹi mutara cap sâmbătă dininti la Sala a Palatlui, tu chirolu anda s-dizvartea Congreslu extraordinar a social-democraţlor, şi grira cu boati contra a PSD şi a suţatalʹei dti easti la guvernari. Trei protestatari fura loaţ di forţali di arada, hiindalui duşi la secţia di poliţie, tra cutulburarea a aradalʹei şi a isihiilʹei publiti.
Autor: Eugen Cojocariu
Armanipsearea: Tascu Lala
