Condamnări cu vazi
Pirmitusearea penală al Dan Voiculescu ahurhi tru 2008 şi s-bitisis tas tora, tru 2014, cu condamnarea a alustui la 10 ani di hapsani ti larea a paradzlor, dimec pi laea, tru cunuscutlu dosar a privatizaril’ei Institutlu di Cercetări Alimentare. Cu complicitatea a nascantor insi cari va s-faca, tru arada a lor, an’i grei di hapsani, Voiculescu ancupara institutlu, ti easti tru un loc rezidenţial aleptui di Bucureşti, cu cama di 100 di n’il’i di euro, tru condiţiile tru cari loclu di anvarliga avea una tin’ie, tru atel chiro, di aproape 8 miliun’i. Procurorl’ii featira isapi, ama ti una zn’ie di 60 di miliun’i di euro, paradz la cari agiumsira prit naua isapi dit oara anda fu ancuprat di Voiculescu tru simfunie cu boom-lu imobiliar dit chirolu 2003-2006.
Ştefan Stoica, 11.08.2014, 10:39
Tra s-anvaleasca cheardirli, statlu baga sechestru pi bunurli imobile a mogului, nica si pi casa tru cari suntu studiourii Antena 1 şi Antena 3. Cara prota easte una televiziune generalistă, Antena 3 easte un postu de ştiri alaxitu, tru scurtu chiro di la lansare, tru una halati di propagandă tra favoarea a conservatorlor şi a camaradzlor politit conjuncturali şi, maxus, tru una armată media ufilisita contra a adversarlor. Easti di notorietate că marli duşman al Voiculescu şi ţinta favorită a atacurlor fapti di Antena 3 easti işis prezidentul Traian Băsescu, stipsit, ma multi ori arada, că ghio taha easti dinapoia a proceslui bitisit viniri. Nu fara scupo, vedetili a postului grira, dumanică, a simpatizanţalor, ti una priimnari simbolică, cu numa a libirtatil’ei”, anvarliga di Palatea Cotroceni, reşedinţa prezidenţială.
Politicieni di stânga, aprucheaţ di Dan Voiculescu şi partidlu a lui, s-loara borgea s-alumta tra libirtatea di exprimare a jurnaliştilor di la Antena 3, fuvirsită, asi cum spun aesta dit soni, di decizia ali instanţa. Asociaţiile independenti a ziariştilor şi comentatorl’ii imparţiali cundil’eara, ama, că varnu nu baga tru piricl’iu lucurlu a atilor di la Antene, ama fac timbihi, tutunaoara ti piricl’iul ca publiclu poati s-hiba bagat dinintea a unui bombardamentu media cu efectu manipulator, di mari piricl’iu. Cari easti Dan Voiculescu, anaparti di falsa postură di victimă a regimlui Băsescu? Un colaborator, scos tru migdani, a Securitatil’ei comunista, di numa a curi s-leagă mistiryioasa chireari a conturlor a familiil’ei al Ceauşescu. Exponenţial tra turlia tru cari s-adrara marli averi postcomunisti, Voiculescu easti, pan tru soni, un di personajili a documentarlui cu numa Kapitalism, reţeta a noastră secretă”, adrat di Alexandru Solomon la 20 di an’i di la cădearea a dictatural’ei.
Tru filmu, Nicolae Ceauşescu s-toarna dupu dauă dechenii şi ari surpriza s-agiunga pi isapea că sturl’i a naual’ei societati capitalista suntu atel’i di ma ninti sturi a comunismului, cari ufilisira mintimen ligaturli ti li avea şi, tru un sistem di arusfeti până la putrigal’iu, u vindura vasilia cu tuti ateali ti eara cu amintaticu. Premonitoriu, trei di personajili a documentarlui sunt, tora, ncl’isi tra fapti di arusfeti. Anamisa di el’i, Dan Voiculescu ica Varanul”, cum lu numasi, inspirat, un cunuscut jurnalist, tra sa scoata tru videala toxicitatea a personajlui.
Armanipsearea: Tascu Lala
