Certificatlu veardi şi relaxărli di la 1 alunaru

Warning: Trying to access array offset on null in /home/web/rri.ro/public/wp-content/themes/rri/template-parts/content.php on line 98
Roxana Vasile, 01.07.2021, 18:08

Di la 1 alunaru, tru Uniunea Europeană s’băgă tu practico certificatlu digital Covid, cari spuni desi aţelu ţi ălu ari easti vaccinat, vindicat ică fu, nu di multu kiro, testatu negativu la infecţia cu noulu coronavirus. Tu kirolu a pandemiillei, călătoriile fură ndilicati, hiinda ananghi formulare, testi şi certificati di vaccinari adrati tru ma multi limbi, pi cari personalu di la yimbruki nu putu s’li akicăsească totna. Tora, noulu certificatu digitalu, ţi easti idyea tru tută Uniunea, ari scupolu s’licşureadză intrarea tru statili membri. Documentul cu cod QR poati s’hibă tipusitu pi carti ică discărcatu tru telefonu şi va s’hibă ghivăsitu la yimbruki cu un scanner specialu.

Tru România, tra loarea-a certificatlui digitalu Covid, Serviciul di Telecomunicaţii Speciale ndreapsi ună platformă securizată pe internet :certificat-covid.gov.ro. Prota ş-prota lipseasti s’hibă băgată ună adresă di email valabilă, cu ea putânda-lui ta si s’llia certificati tră tuţ membrilli ali familie. Deapoa CNP-ul şi datili a actului di identitati ufilisiti cându vărnu s-ari dusă la vaccinare, lo cartea că tricu pritu lăngoari ică rezultatlu negativu la testu. Sistemlu nica caftă şi alte date, cum easti judeţlu tru cari s-feaţi vaccinarea şi turlia di vaccin ufilisitu, data la cari s-feaţi imunizarea, respectiv data a rapelui tru cazlu a serurilor cu doauă dozi. Tra cilimeañilli sum 14 ani, s’caftă acordul a părinţălor.

Multu importantu, STS faţi urminie să s’caftă certificatlu cu ţinţi dzăli ninti di fudzeari tră aţelli vaccinaţ şi cu nai ma pţănu 12 ică 48 di săhăţ tru cazlu a persoanilor cari feaţiră unu testu rapidu, respectivu PCR. Va s’aibă și un call-center tru agiutorlu a aţiloru cari voru certificatlu şi nu ştiu s’lucreadză cu platforma digitală.

Tra ună persoană testată, certificatlu veardi european Covid easti valabil 24 di săhăţ tru cazul unui testu antigenu rapidu, respectivu 72 di săhăţ, a unui testu PCR. Tra atelu ţi tricu pritu lăngoari, valabilitatea easti di 180 di dzăli di la data a primlui testu pozitiv nregistratu. Neise, tru cazlu a aţiloru vaccinaţ cu schema completă, certificatlu expiră tru alunaru anlu yinitoru.

Tru paralelu, pritu adeti, la 1 alunaru s’da cali ti nkisita a vacanțăllei di veară, furñie tra autoritățli române s’dimăndă năi misuri di relaxari a restricţiilor, cu impactu hăirlăticu și la nivelu turisticu. Creaşti, dimecu, numirlu a persoanilor cari pot s’llia parti la evenimenti privati. S’lundzeaşti până la oara 2:00 programlu a cluburlor, a restaurantelor şi al cafineadzloru, creaşti numirlu a spectatorilor cari pot s’llia parti la evenimente sportivi, iara hotelurli şi pensiunile pot s’aproaki turişti până la capacitatea maximă. Tutunăoară, născănti spectacoli va s’poată să s’ţănă nica și cu vinita a 2.500 di spectatori ică ş-ma multu, cu căftarea că a cathi unlui om să’lli si asiguripsească un locu di 2 metri.

Autoru: Roxana Vasile

Armânipsearea: Taşcu Lala