Cartea digitală și urdinarea tru UE
Corina Cristea, 14.08.2021, 14:01
Ditu 13 di agustu, tră triţearea-a sinurloru di statu la nivelu a statiloru a Uniunillei Europeani suntu pricunuscuti ca documenti doveditoari a vaccinarillei, triţearea pritu lăngoari şi a rezultatlui negativ a unlui testu maş pritu cărţăli digitale. Pritu aţea că maca au un codu QR, aestea spunu că posesorlu easti ică vaccinatu cu unu ditu vaccinurli pricunuscuti di cătră UE, ică tricu pritu lăngoari tru şasilli meşi ditu soni, ică ari un testu negativu ţi fu adratu tru 72 -li săhăţ ditu soni.
“Niţi unu altu documentu nu va s’da izini tră triţearea-a sinurloru interni ali Uniuni ică intrarea tru un statu membru ali Uniuni fără tiñisearea-a condiţiiloru di carantină ţi li pruveadi legislaţia aluştoru stati. Ama tra s’treacă sinurlu fără s’şeadă tru carantină easti ananghi ti aestu documentu unicu, ufilisitu di tuti statili membri, avânda idyili caracteristiţ și cari poati s’hibă discărcatu tră cetăţeañilli români di pi site-ul vaccinari-covid.gov.ro”, cundille la un postu TV particular, Andrei Ţărnea, directorlu a Departamentului di comunicari şi diplomaţie publică ditu Ministerlu di Externi.
Năili pruvideri suntu pruvidzuti tru Regulamentul europeanu mutrinda cărţăli digitali ţi au scupolu s’licşureadză libira urdinari tu kirolu a pandemiillei şi suntu băgati tu practico maş la triţearea a sinurlui di statu, nu şi tră activităţli disvărtiti năuntrurlu a teritoriului naţionalu ali Românie, cundille Gruplu di Comunicari Strateghică di București. Asociaţia Naţională a Agenţiilor di Turismu (ANAT) cundilleadză, tu arada-a llei, că obligativitatea ti păristisearea-a cartillei digitală spuni maş ti statili cari căftă ahtări documenti, cata cum adeverinţa di vaccinari, testi ică dovada imunizarillei, cum şi la turnarea tru România ditu stati ţi suntu pi listili galbină şi aroşe. Turiştilli cari s’toarnă ditu ună văsilie ţi easti pi lista veardi nu lipseaşti s’păristisească cartea digitală şi niţi nu intră tru carantină, nica spuni asociaţia.
Cartea digitală ari la thimelliu unu sistemu unitaru cari garanteadză autentiţitatea-a vaccinurlor ică a testilor, tra s’nu s’facă falsificarea aluştoru şi făţemu urminie ti discărcarea aluştoru, cari easti multu lişoară, exighisi prezidentulu ANAT, Dumitru Luca. Suntu locuri tru cari aestă carti digitală easti ufilisitoari şi tru alti circumstanţi andicra di triţearea-a sinurloru di stat. Suntu linii aeriene cari s’caftă prezentarea aliştei carti ninti di alinari, ti exemplu.
Tru Franţa ţă caftă aestu documentu şi cându ti aliñi tru trenu, cându inţră tru restaurantu ică atumţea cându nedz la muzeu, catandisi ţi easti şi tru Italia, a deapoa tru Gărţie cartea digitală easti căftată anda ti-aliñi pi ferryboat. Alliumtrea easti tu Vărgărie iu nu caftă păristisearea a cartillei digitală niţi la sinuru. București, după aţea ditu soni actualizari a văsiliiloru cu riscu epidimiologhicu, pi lista aroși intră Turchia, Israel și Statili Unite, aclo iu suntu cama di multu kiro Spania, Gărţia ică Marea Britanie. Alliumtrea, Olanda și Malta, cari eara pi lista aroși, tricură pi aţea galbina dupu scădearea-a cazurlor di coronavirus. Naua listă intră tru lucru tu giumitatea-a aluştui mesu.
Autoru: Corina Cristea
Armânipsearea: Taşcu Lala
