Cali libiră tra referendumlu mutrindalui alumta anticorupţie

Anlu politic ahurhi una s-una tru România. Fu bagat pi ipotisi un nau Guvernu, aplicat catra stânga di furn’ia a PSD, amintâtorlu detaşat a scrutinlui dit andreu, secondat di ALDE. Un guvernu cari s-ayun’iusi s-adopta una parte dit misurli tra tin’iili di cafi mes şi sutiali taxiti şi cari l’i-adusira hairlatica electorala, a deapoa ciudusi tuta lumea cu dauă proiecte di ordonanţă di urgenţă ti avea tru plan s-opereadza una graţieri colectivă şi s-habiniseasca legislaţia penală, di al’i favoriza corupţal’i. Cu doilu proiectu, Cabinetlu PSD-ALDE u spusi vrearea tra s-duca pan tru cap, di scoasi tru migdani critit serti a instituţiilor judiciari, mari protesti pi geadei şi dipunearea a unei moţiuni di cenzură dit partea ali opoziţie di dreapta.

Ştefan Stoica, 14.02.2017, 12:54

Pan tru soni, guvernul abroga hulita ordonanţă cari dezincrimina parţial abuzlu tru lucru. Ninti di aesti evenimenti tru cascadă, prezidentul Klaus Iohannis feati mutari pi tabla a political’ei, dimandandalui că va la cafta a român’ilor să-si spuna minduita prit vot, la referendum, tra alumta contra ali corupţie. Aca majoritar ostil a şeflui a statlui, Legislativlu ş-deadi, luni, avizlu, una procedură formală cari adusi furn’ie, ama, tra loari di poziţii dit partea a susţanătorlor şi a adversarlor tra ideea di consultari populară pi tema ali corupţie.

Prezidentul interimar a PNL, Raluca Turcan, s-ufilisi di dezbateri tra sa-l’i critica, diznau, pi liderl’ii a coaliţiil’ei guvernamentali şi pi premier: “Putem s-limbidzam şi să spunem a oamin’in’ilor că purtaticlu a lor politic ti lu-avura şi domnul Dragnea, şi domnul Tăriceanu, şi domnul Grindeanu fu un accidentu şi vahi va s-putem s-apraftasim aesta turlie s-dăm semnalu a unei politit di forţă cari scoati România dit un conclav politic şi u astearni pi calea ali democraţie europeana occidentala”.

Di partea a lui, senatorlu ALDE Varujan Vosganian feati timbihi că aestu demersu- cu final aştiptat, tru minduita a lui, tra atea că fenomenlu ali corupţie nu poati s-aiba aderenţa – va s-custuseasca aproximativ 30 di miliun’i di euro. Varujan Vosganian: “Io ntreb, atumtea cându easti zborlu di un referendum tra cari him simfun’I tuţ cu tuţ, la cari escu candasitu că partidile hiindalui simfuni, electoratlu va s-hiba, idyealui, simfun, dimi easti cronica a unei aprobări dimandati – şi atumta vă întreb: cate hargiuim noi dzat di miliun’i di euro tra atea ti stim, dimi, ca cum ti s-hiba va sa s-facâ?”

Partidile a coaliţiil’ei majoritari îl suspecteadză pi prezidentul Iohannis că ari un sinfer electoral pi chiro di mesi şi pi lungu chiro, tru perspectiva a alidzerlor prezidenţiali dit 2019. Si s-hiba aşi, atel cari al’I adusi dininti barutea fu guvernul PSD-ALDE, prit apofasi discutabile tru crehta dumeni ali justiţie.

Autor: Ştefan Stoica

Armanipsearea: Tascu Lala