Calculi di turlii electoralâ

Victor Ponta şi Klaus Iohannis va s-alumtâ tu doilu tur a alidzerilor prezidenţiali dit Românii.

Roxana Vasile, 04.11.2014, 11:59

Victor Ponta şi Klaus Iohannis va s-alumtâ tu doilu tur a alidzerilor prezidenţiali dit Românii.

Dupu hâbarea mutrinda rezultatili dit protlu tur, di Duminicâ, doil’ii candidaţ şi echipili a lor electorali andreg tora, strategiili di turlii electoralâ pi cari s-li bagâ tu practico tu ţi mutreaşti scrutinlu dit 16 di Brumar.

Campania dinâintea a votlui dit protlu tur fu niham ayoriea — icâ nu furâ ici multi adunări electorali, iara dezbaterli, moaubeţli tilivizati cari lipsea s-îi agiutâ pi român’i s-aflâ di programili electorali aţilor 14 candidaţ, aproapea că nu furâ.

Yinitoarâli ma pţân di dauâ stâmân’i va s-hibâ influenţati di eforturli aţilor doi armaşi tu competiţii, ta s-l’ia ţi lâ lipseascu ta s-şi asiguripseascâ amintarea dit soni. Armâni di vidzut ş-cum va s-adarâ aestu lucru !

Cu aproapea 40% dit voturli aspusi Duminicâ, premierlu soţial-democrat Victor Ponta, candidat di partea a suţatâl’ei electoralâ PSD-UNPR-PC, tora la guvernari, va s-anchiseascâ pi 16 di Brumar dit “pole-position”. Pistipseaşti că şansili a lui ta s-adunâ ma ghini di giumitati dit voturi va s-creascâ multu cara el va s-dzâcâ a cetăţen’ilor numa a premierlui pi cari va l-bagâ pi ipotisi, maca el va s-amintâ alidzerli. Victor Ponta: “Va mi andamusescu cu reprezentanţâl’ii a suţatâl’ei di guvernari şi, deadun, va s-hâbârisim omlu icâ oamin’ii ţi au puterea s-cumândiseascâ un nău guvernu ali Românii.”

Multu zburâtâ easti, anamisa di alti, numa a aţilui di tora prezidentu a Senatului, Călin Popescu – Tăriceanu, ţi luă parti ca independentu tu protlu tur, cari adună cama di 5% dit voturi, ş-pi cari Victor Ponta caftâ tora s-lu-aducâ anamisa di el. Premierlu ari nâdii şi la unâ parti dit voturli dati dati, Duminicâ, al Kelemen Hunor, prezidentul al UDMR, partid ţi s-aflâ tora tu suţata di guvernari. Şi, câ ţe nu, el ari nâdi ş-tu ţi mutreaşti voturli dit zona populist-naţionalistâ, cumândisitâ di Dan Diaconescu şi Corneliu Vadim Tudor.

Tu ţi-l mutreaşti pi alantu candidat, etniclu gherman Klaus Iohannis, reprezentantul a Alianţâl’ei Criştin Liberalâ, aestu dit soni hâbârisi că nu va s-pâzâripseascâ cu alanţâ candidaţ ta s-şi asiguripseascâ andruparea lor doilu tur. Klaus Iohannis: “Caftu votlu a tutulor român’ilor cari pistipsescu că mini am puterea s-alâxescu catandisea dit politica româneascâ. Îi câlisisescu, îi pâlcârsescu ta s-yinâ anamisa di mini. Voi s-intru tu unâ ligâturâ directâ cu aligâtorlu, nu prit alţâ politicien’i. Aşi, nu va s-pâzâripsescu ici cu candidaţl’ii ţi inşirâ dit cursă.”

Klaus Iohannis, cari adună, pi 2 di Brumar, iuva la 30% dit voturi, poati s-aibâ hâiri di voturli a aligâtorilor dit protlu tur ali Elena Udrea şi Monica Macovei, cari, deadun, au aproapea 10% dit voturli a aligâtorilor di dreapta.

Dinclo di tutâ matematica electoralâ cari s-adarâ tu ţi mutreaşti dauli tururi di vot, pânâ tu soni, ama, maşi alidzerea a cathiunlui român va s-adarâ diferenţa. Ahât Victor Ponta, cât şi Klaus Iohannis tâxescu unâ altâ turlii di politicâ andicra di aţea dusâ, pi un chiro di dzaţi an’i, di aţel di tora prezidentu di ţentru-dreapta, Traian Băsescu.