Apofasi tru dosarlu Dragnea
S-duc ma largu mintireasili dit Justiţie tra omlu furteata a Putearil’ei di Bucureşti. Luni, Analta Curte di Casaţie şi Justiţie nu apruke contestaţia la executari dipusă di prezidentul PSD şi a Cameral’ei a Deputaţlor, Liviu Dragnea, contra a condamnaril’ei ti doi an’i hapsani cu suspendari ti li lo, anlu ti tricu, tru dosarlu cu numa Referendumlu. Apofasea easti defintivă. Dragnea fu condamnat ti furn’ia că, tru 2012, ninti şi tru chirolu a dizvartearil’ei referendumlu tra demiterea al Traian Băsescu dit ipotisea di prezidentu ali Românie, ndreapsi, ca secretar general a PSD, un sistem ti ari scupolu s-alaxeasca rezultatlu a votlui, tra s-aiba cvorumlu ananghisitu tra demiteri. Până tru soni, cvorumul nu fu agiumtu, referendumlu fu invalidat, Băsescu armasi prezidentu, iara Dragnea s-aleapsi cu cazier.
Bogdan Matei, 25.04.2017, 13:10
Tru scurtu anlu aestu, el nchisi una acţiune tra discl’idearea diznau a proceslui, prit atea ca dipusi tru instanţă una contestaţii la executare, una caftari extraordinară di ataca. Avocaţl’i a lui caftara tru instanţă anularea ali apofasi dit dosarlu “Referendumlu”, cu furn’ia că dauă giudicătoare dit complet s-pensionara ninti di redactarea a motivaril’ei, iara tru loclu a lor simna altuvara. Tutunaoara, el’i cutugursira că fu nastricut vadelu legal di 30 di dzale tra redactarea a motivaril’ei tru aestu dosar. Io, după aproapea 10 mesi di dzali, nu am aeastă motivari — aesta va s-dzaca că apofasea nu easti completă” — spunea atumtea Dragnea. Apofasea di luni a instanţal’ei suprema îlu fati ma crehtu prezidentul a PSD. Anlu ti tricu, tru 15 di alunar, procurorl’ii DNA alu pitricura tru giudico tra instigari la abuz tru lucru şi instigari la fals intelectual, tru dosarlu tru cari easti stipsitu, deadun cu atea di ma nainti a lui nicuchira, Bombonica Prodana, tra fapti ti li ari adrata tru chirolu cându eara prezidentu a Consiliului Judeţean Teleorman (sud).
Anchetatorl’i spun că el feati ca ma mulţa lucratori a Direcţiil’ei di Asistenţă Socială s-bagă pi lucru, fictiv, dauă persoane, membri ali organizaţie PSD Teleorman. Aesti fura paltiti cu paradz, aca lucra exclusiv tra partid. Comentatorl’i cundil’eadză că, uidisitu cu legislaţia penala româneasca, tru cazlu a unei condamnări tru aestu nau dosar, Dragnea easti tru piricl’iu s-executa şi atel’i doi an’i di hapsani ti al’i si deadira, iniţial, cu supendari. Atea ti poati s-lu scoata definitiv di pi una scenă politică pi cari, după alidzerli parlamentari dit 11 di andreu 2016, u domină categoric. Sum cumandusearea a lui, PSD aminta, atumtea, 45% dit sufragii, nai cama bun scor electoral a stângal’ei tru atel dit soni cirec di secol. Componenţa şi programlu a Guvernului adrat di PSD deadun cu partenerlu junior ALDE şi cumandusit di social-democratlu Sorin Grindeanu suntu expresia a volil’ei al Dragnea. Tamama cându agiumsi tru kipita a carieral’ei a lui politica, liderlu PSD easti, spun analiştil’i, ma slaghitu ca varnaoara.
Autor: Bogdan Matei
Armanipsearea: Tascu Lala
