Apofasi mutrinda purtarea prusupidăllei de protecţie
Curtea Constituţională a Româniillei apufusi că ordonanţa de urgenţă adoptată tru brumaru 2020, prit cari agiundzea obligatorie purtarea prusupidăllei de protecţie tru spaţiile publice exterioare, easti niconstituţională. Ordonanţa nu avu avizul a Consiliului legislativ, organ consultativ a Parlamentului, exighisi Curtea. Apofasea-a CCR va s’bagă tu lucru maş după publicarea a llei tru Monitorul Oficial. Executivul pusi că va s’llia ună apofasi tru simfunie, ună ş-ună ţi va s’alăncească apofasea a CCR. Aesta yinoi tru un moment tru cari să zburaşti ti relaxarea, I nica şi tră eliminarea cvasitotală a restricţiilor. Specialiştilli lugursescu, di altă parte, că purtarea prusupidallei nu reprezentă o restricţie, că maş ună cale, vahi nai ma hăirlătică, ti preveniri infectarea. Directorul medical a Institutului Matei Balş ditu capitală, Adrian Marinescu:
Ştefan Stoica, 16.02.2022, 14:40
“Ditu misurli cari preveniră infectarea – eu nu li spunu ca măsuri restrictive — tu kirolu a pandemiei, easti limbidu că prusupida fu atea nai ma hăirlătică; că zburămu ti prusupidă la interior prota ti prota, că zburămu ti prusupidă la interior atumţea când sunt zone cu călbălăki, cându oamiñilli interferă, easti limbidu că prusupida feaţi dgheafuraua, ahât cât putu su facă, ici ţiuva nu easti sută la sută. Şi atumţea, ma s’nă minduimu ditu videala medicală la ţi va s’hibă, dealihea vără turlie logicu, va s’trădzemu mănă prota ş’prota ti exterior, deapoa va s’agindzemu s’nu mata ufilisimu prusupida ici şi niţi alanti reguli. Ama minduescu că lipseaşti s’nă minduimu şi, s’hibă limbidu, avumu ananghi tu pandemie, avumu ananghi pănă tora şi, ma s’nu aveamu aesti misuri de prevenţie, explozia de cazuri vrea s’hibă limbidu ma mari şi atumţea vrea s’aveamu ma mulţă oamiñi kiruţ”.
Ministrul a Sănăttatillii, Alexandru Rafila, spusi că ufilisirea a prusupidallei ari scupolu ti protecţia a populaţiillei tru una perioadă când ari ună transmitere intensă a viruslui. Tru ţi mutreaşti multu aştiptata relaxare, pe cari el işişi u adusi aminti, Rafila căndăseaşti s’avrmu ngătanu. El spune că nu vini nica oara, căţe ari zone dinamice economic iu transmiterea easti favorizată. Alexandru Rafila:
“Bucureşti, Cluj, Timişoara, dimi aoa fu şi incidenţa nai ma mare. Normal, până tu soni, s’hibă aşi di itia tră că sunt zone cu călbălăki, cu multă urdinari mobilitate şi lucrul aestu favorizeadză transmiterea multu ma multu, de exemplu, andicra di un căsăbă ñicu di ună zonă rurală şi presiunea pe sistemul de sănătate easti idyea mari tru aesti localităţi şi ti atea lipseaşti s’avemu ngătanu; dealihea tutţ vremu şi tru stămânile yinitoari va s’tragă mănă di la ună parte ditu restricţii, deapoia vahi va s’tragă mănă şi di la starea de alertă, ama lucrul aestu lipseasti adrari etapizat, andicra di turlia tru cari sistemul de sănătate easti sumu presiune. Nu putem s’lom misuri cari s’bagă tu piriclliu bana a oamiñiloru.” Ministrul a Sănătatillei mindueaşti că până ti sărbătorli di Paşte poati să s’agiungă la normalitatea ţi eara ninti di pandemie.
Autor: Stefan Stoica
Armânipsearia: Taşcu Lala
