Apofasi icunumiţi tru bitisita di an
Dupâ haraua la cari s-agiumsi cu furn’ia a alidzerlor prezidinţiali dit meslu Brumar, agenda di lucru di Bucureşti ari tru amprotusa, tora chestiun’ili di turlii icunumicâ. Pâzârapserli-maraton purtati chiro di ndauă dzăli di autorităţle români cu reprezentanţăl’i a instituţiilor internaţionali creditoari featiră lun’ină la născăntă indicatori di simasie ti adrarea a bugetlui pi 2015. Anamisa di aeştă — nivelu a deficitlui, tră cari s-achicăsiră la 1,83% dit Produslu Internu Brut, ma mari andicra di ţinta di 1,4% pi cari executivlu român ş-u avea pripusă. Bucureştiul căftă şi n’icsurarea a cursului la cari va s-hibă fapti isapi accizele tru 2015, ama fârâ hâiri.
Corina Cristea, 11.12.2014, 17:43
Fondul Monetar Internaţional spusi că easti ghini s-aibă un excedentu di venituri la buget. Dimec, accizili va s-hibă calculati idyealui ca tru anlu aestu, la un cursu di 4,73 lei trâ un euro.
Ministurlu delegat tră Buget, Darius Vâlcov, spusi că, prit alaxearea di cătră guvernu a Codlui Fiscal, nivelu a accizilor va s-hibă exprimat tru lei ahurhindalui di anlu yinitor, iara dit 2016 va s-hiba actualizat, cafi an, cu rata ali inflaţie: Nchisim cu una metodologhie ti fateari isapea preferată di multi vasilii dit Uniunea Europeană şi lugursim că totna lipseasti s-na raportăm la leu ş-nu la euro, şi la inflaţie, ma s-fătem atea medie, cum s-feati până tora. Dimec, pan tru soni, s-alaxi masi metodologhia di calcul, nu na raportam la un nivel a monedal’ei euro, alta turlie. Tamam s-bitisirâ pazârâpserli cu Fondul Monetar Internaţional şi Comisia Europeană şi, deadun, apufusim aestu nivel. Fu una pripuniri di partea noastâ s-zburâm trâ altu nivel. Niţi unâ pripuniri zburâtâ cu Fondul Monetar Internaţional şi Comisia Europeană nu avea tru plan cristearea, că totna zburâm di un nivel ma n’ic, ama, aşi cum n-achicăsim, după ti va s-videm execuţia tru atea ti mutreasti amintatitli tră anlu yinitor va s-putem s-yinim cu ahtări misuri, di n’icşurari a nivelui, inclusiv la accizi, ti furn’ia că, până tora, moeabetli, maxus avură tru prota thesi n’icsurarea a TVA-ului.”
Tru minduita al Darius Vâlcov, acordul cu Fondul Monetar Internaţional va s-hibă bitisitu tru yismaciuni, anlu yinitor, ama nu mata va s-hibă prilundzitu. Ministurlu tra Buget cundil’e că România ari un fondu di rezervă (buffer) di 9,25 miliardi di euro, cari îl’i da di mănă a statlui, tru unâ catandisi ipotetică di crizâ icunumicâ sertâ, sâ-şi anvâleascâ ti un chiro di 6-7 mesi tuti borgili finanţiari ţi li ari andicra di cetăţeni, câtâ cum tin’iili di cafi mes ică pensii, fârâ s-lia ampurmuturi.
Armanipsearea: Tascu Lala
