Andamusea a teatrilor naționali tu Chișinău
16 teatri naţionali ditu Românie şi Republica Moldova s-adunâ Chişinău, iu, ahurhindalui di adzâ ş-pânâ tu 22 di yizmâciuni, va s-facâ 9-a ediţie ali "Andamusi a teatriloru naţionali româneşțâ".
Tașcu Lala, 13.09.2024, 07:21
Teatrili naţionali româneşțâ s-adunâ Chişinău, tu Republica Moldova, la 9-a ediţie a nai ma marlui festival evropean a artilor sțeniți. Evenimentul, andreptu di Teatrul Național „Mihai Eminescu” ditu capitala moldoveneascâ deadunu cu reprezentanţa a Institutlui Cultural Român di nastânga a Prutlui ş-cu Ministerili a Culturillei ditu Românie ş-ditu Republica Moldova, s-fați ahurhindalui di adzâ ş-pânâ tu 22 di yizmâciuni.
Ti 4-lu anu arada vestivallu s-dizvârteaști cu andruparea a prezidențâloru ali Românie ş-ali Republicâ Moldova, Klaus Iohannis și, dimi, Maia Sandu, iara ediţia di estanu ari motto-ul „Ligâturi Evropeani”. Tu kiro di 13 dzâli, publiclu di Chişinău ari 27 di spectacoli tu salâ, ama ș-nafoarâ, 8 audiţii di spectacoli radiofoniți şi 6 premieri.
Tutnâoarâ, sum numa „Identităț lingvistiți – identitati evropeanâ (memorie, artâ, management cultural)” va s-facâ 10 lansări di carti ş-andamusi cu oamiñi di culturâ ş-personalităţ ditu lumea a teatrului, pritu cari Emil Boroghină, Ludmila Patlanjoglu, Matei Vișniec, Ana Blandiana, Aura Corbeanu, Ion Bogdan Lefter, Maria Zărnescu, Oana Borș ş-mulţâ alţâ. România easti reprezentatâ di Teatrul Național „I. L. Caragiale” di București, Teatrul Național „Vasile Alecsandri” di Iași, Teatrul Național „Radu Stanca” di Sibiu, Teatrul Național „Marin Sorescu” di Craiova, Teatrul Național „Lucian Blaga” di Cluj-Napoca, Teatrul Național Târgu-Mureș, Teatrul di Statu Custanța, Teatrul „Matei Vișniec” di Suceava, Teatrul Național Radiofonic ş-Gigi Căciuleanu Romania Dance Company.
Di partea alantâ, va s-hibâ adusi dininti 8 instituţii teatrali, Teatrul Național „Mihai Eminescu”, Teatrul Republicanu „Luțeafirli”, Teatrul Național „Vasile Alecsandri” di Bălți, Teatrul Național „Eugène Ionesco”, Teatrul „B.P. Haşdeu” di Cahul, Teatrul Național Satiricus „I.L. Caragiale”, Teatrul „Alexie Mateevici” ş-Teatrul Fârâ Numâ – Chentrul Ginta Latinâ. Oaspi di tiñie a festivallui easti Teatrul Naţional Dramatic „Ivan Franko” di Kiev.
Andamusea a Teatriloru Naționali Româneșțâ fu andreaptâ ti prota oarâ tu 2015, iara fotisi ti ahtari lcuru fu proiectul „Teatrul românescu București – Iași – Chișinău”, anchisitu cu unu anu ma ninti di doilli directori a Teatriloru Naționali di București ș-Chișinău, marli teatrinu Ion Caramitru ș-dimi, reghizorlu Petru Hadârcă. Proiectul fu minduitu ca unu fluminu di spectacoli ditu ascâpitatâ câtrâ Chișinău ta s-hibâ paradignâ ti avalanșa di mesaji ș-pirmithi di propagandâ aruseascâ ți cumândârsea spațiul public ș-mediaticu tu ațea oarâ, ta s-lâ da a țetățeañiloru moldoveñi reperi dimucratiți şi s-lâ hibâ ș-unâ ancorâ tu spațiul a lumillei elefterâ.
Autor: Sorin Iordan
Apriduțerea: Tașcu Lala
