Alaxerli la legislaţia penală, vartos contestati (31 di Yinaru 2017)
România bânâ unâ dzuuâ pi cari işisi prezidentul Klaus Iohannis u numasi di jali, ama vini deapoa si una noapti albă, tru cari s-featira vartoasi si fuviroasi protesti spontani tru tut marl’i casabadz a vasiliil’ei. Easti ti niaprukeari, una nitin’iseari dimec atea ca Guvernul s-adopta noaptea, fără s-hiba bagata tru arada di lucru a dzuual’ei, una ordonanţă di urgenţă tru un domeniu ahât crehtu cum easti Codlu penal şi Codlu di procedură penală. Aestă chestiune nu easti tra straxeari” – spusi Iohannis, după ti Cabinetlu PSD-ALDI aproba, marţa dicseară, amanat, ti ciudusearea generală, una ordonanţă di urgenţă tra alaxearea şi completarea a Codurlor.
Bogdan Matei, 01.02.2017, 13:23
Nai cama marea parti a pruviderlor dit ordonanţa va s-intră tru lucru dupu 10 dzali di la publicari. Sum praglu a unal’ei zn’ie di 200.000 di lei (echivalentul ti aproapea 50 di n’il’i di euro), abuzul tru lucru numata va s-hiba sancţionat penal. A deapoa favorizarea a infractorlui, inclusiv prit adoptarea di acte normative, cata cum ordonanţele di noapti, fu dizincriminată. Ordonanţa nica pruveadi că favorizarea a infractorului s-dezincrimineadză şi cara fapta easti adrată di un membru ali familie ica di un afin până la gradlu II. Alaxearea a Codlui Penal scoasi tru migdani protesti babageani Bucureşti şi tru marl’i casabadz a vasiliil’ei.
Tut cu tut, 40 di n’il’i di oamin’i işira spontan pi geadei, tu cingrimi şi scutidi, tu idyiul kiro Bucureşti, Cluj (nord-vest), Sibiu (centru), Timişoara (vest) ica Iaşi (nord-est). Masi tru Capitală, cama di 12 di n’il’i di manifestanţa anvarligara sediul a Guvernului. Echipa executivă cumandusită di social-democratlu Sorin Grindeanu fu prota, tru aestu dit soni cirec di eta, evacuată di la lucru cu duba, di jandarmi. Niifharistusearea a protestatarlor fu amplificată di turlia, pi cari mulţa spusira ca easti fureasca asi cum feati lucurlu Putearea. Nu ma amanat di dumanică, aproapea 100 di n’il’i di oamin’i avea mutata cap, tru tută vasilia şi tru diaspora, contra a naetil’ei a Guvernului tra s-alaxeasca Codurli şi tra s-faca una graţieri colectivă, tra cari spuni ca ari scupolu s-ndreaga marea calbalaki dit hapsan’i. Luni, ministurlu ali Justiţie, Florin Iordache, avea tanuta una moeabeti pi aesta temă şi avea taxita că va s-acaţa tru isapi minduerli spusi aclo.
Demersul a Guvernului fu cutugursit sertu şi di şefan’il’i a parchetilor — General, DNA, DIICOT – şi di Consiliul Superior ali Magistratura, cari u spusira minduita tut cu tut că, statlu di dreptu tradzi cabaia ca easti agudit sertu şi că suntu curmaţ an’i di alumtă contra ali corupţie. Comparată cu celebra opearaţiuni Mân’i chischini” dit Italia, cari ava nascarsita putregal’ilu a clasal’ei polititi di Roma, campania anticorupţie dit România pitricu tru boxa a stipsiţlor un premier tru exerciţiu, foşti şefi di guvernu, dzat di miniştri, parlamentari, prefecţa, primari, prezidenţa di consilii judeţeni, di la puteari ica dit opoziţie, di dreapta ica di stânga.
Tora, speculeadză presa, idyealui autohtonă şi internaţională, un Guvernu tut cu tut pan di mardzina s-ascumbusi tra ş-ascapa şeflu politic, liderlu PSD, Liviu Dragnea. Hiindalui di ma nainti condamnat, anlu ti tricu, ti doi ani di hapsani cu suspendari, ti minduita di furlaki, tru 2012, a referendumlui di demiteri a prezidentului dit epocă, Traian Băsescu, Dragnea easti giudicat tora la Analta Curti di Casaţie şi Justiţie cu stepsul di instigari/ mutari cap la abuz tru lucru.
Uidisitu cu atea ti spun procurorl’i, el apufusi bagarea tru lucru a dauă membri PSD la Direcţia Generală di Asistenţă Socială şi Protecţia a Copilului (DGASPC) dit Teleorman (sud, judeţlu a lui iu s-amintă). Aesti s-pari ca fura păltite cu paradz publit ti un lucru fictiv, cate, dimec, au lucrata masi la partid. Zn’iia fapta isapi di procurori easti di aproapea 24 di n’il’i di euro. Iara praglu alinat di ordonanţili guvernamentali la 200.000 di lei îl exonereadză, practic, spun comentatorl’ii, pi omlu furteata a stângal’ei. Atel cari, pe 11 di andreu, lu-adusi PSD la una victorie categorică la parlamentari ama ici nu taxi, tru campanie, că va s-curma anticorupţia.
Autor: Bogdan Matei
Armaniopsearea: Tascu Lala
