Alăxeri tru PSD
Tru PSD, prota avyiulie a guvernaril’ei di Bucureşti, ş-li yitripseasti arăn’ili şi s-ampartu diznău ipotisili. Partidlu easti ca lăndzitu după ţi, maşi ti 48 di săhăt, tricu prit un diplo cutreambur di magnituditi istorică. Dumănică, la alidzerli tră Parlamentul European, social-democraţl’i bitisiră pi doilu loc, cu 23%, la ndauă proţente dupu PNL şi cu un avansu aproapea insignifiantu andicra di treia clasată, Alianţa USR-PLUS. ALDE, partenerlu-junior a PSD la guvernare, easti sum praglu electoral di 5%.
Bogdan Matei, 29.05.2019, 12:50
Ma multu, convocat di prezidentul Klaus Iohannis, adversar jurat a stângăl’ei, şi organizat unăoară cu euroscrutinlu, referendumlu pi teme di justiţie confirmă volea a unăl’ei majoritati netă dit socitetate ca alumta anticorupţie să s-ducă ma largu. Iara luni fostul om forte ali coaliţie guvernamentală, Liviu Dragnea, fu ncl’isu după ţi fu condamnat di instanţa supremă la hăpsani cu executare tra fapte di corupţie. Trei ani şi giumitati va s-şeadă aestu dupu heari, tra instigari la abuz tru lucru, tru chirolu anda eara prezidentul a Consiliului Judeţean Teleorman (sud). Ma ninti, Dragnea fu condamnat şi la doi ani di hăpsani cu suspendare tră furlăchi electorală. Işea, aestă turlie, dit scenă omlu cari, tru andreu 2016, lu avea dusă PSD tu ună victorie istorică la legislative, cu aproapea 45% dit voturi, dimec di dauă ori ma multu andicra di ţi amintă tora, după doi ani şi giumitati di guvernare duchită di multi ori ca hiina populistă, discreţionară şi haotică. Promovată di işişi Dragnea şi lugursită ună fidelă a aiştui, premierlu Viorica Dăncilă prilo, ca prezidentu executiv, şefia interimară a PSD, până la organizarea a unui congres extraordinar. Protili decizii adoptate di cumăndusearea social-democrată spuni ma multu ună ampărtari di epoca Dragnea.
Multu cu boati şi impopularlu secretar general Codrin Ştefănescu fu alăxitu. S-toarnă tru chipită personaji ţi cădzură tru dizgraţia a fostului şef. Ase, ex-vicepremierlu Paul Stănescu easti năulu prezidentu executiv, iara primarlu gheneral ali Capitală, Gabriela Firea, agiundzi diznãu vitepreşedentu şi şef interimar ali Organizaţie di Bucureşti. Aestă dit soni, pitricu şi un mesaj di ampăcari cătră foştil’i dizidenţă social-democraţ, ţi s-trapsiră tru partidlu Pro România a fostului premier Victor Ponta. Tru arada-l’i, premierlu Dăncilă cundil’e tră unitate tru partid, tra dialog şi discl’ideari cătră iţi membru ţi va tra s-hibă deadun cu social-democraţl’i.
Cumăndusearea PSD votă tra s-arm1nă la guvernari. Nu easti limbid, toradioară, desi partidlu va li facă nanăparti politiţli consacrate di Dragnea şi percepute di opoziţie, presă şi societatea civilă ca ună cilăstăseari niacumtinată tra să-l’i aibă sum cumandu magistraţl’i şi tra s-dănăsdească alumta anticorupţie. Naua şefă a social-democraţlor nica dimăndă că va s-ducă Bruxelles, tra să zburască cu responsabilii a instituţiilor europene, cum şi tru alti capitale occidentali, iu va s-adună cu lideri di stânga, cu minduirea tra s-u ndreagă şi imaghinea externă. Ti furn’ia că, tru apriiur, partidlu a socialiştilor europeni dimăndă ngl’iţarea a lig1turlor cu PSD, di itia a găilipserlor mutrindalui nitin’isearea a statlui di drept tru România.
Autor: Bogdan Matei
Armanipsearea: Tascu Lala
