Alănci doilu tomu a Atlaslui lingvistic a dialectului armânescu
Uidisitu cu ună postari faptă pi frăndza di Facebook ali Academie Română, alăncearea-a aluştui doilu tomu easti un importantu evenimentu editorialu tră lingvistica şi tră cultura română, di itia că atlaslu easti prota lucrari di amploari ahărdzită ti nai cama importantu dialectu românescu ţi să zburaşti tru sudlu a Dunăllei – aromâna.
Tașcu Lala, 06.05.2021, 13:07
Lucrarea scoati tu videală graiurli armâneşti ţi să zburăscu tu aestu kiro tu Gărţie, Arbinişie, Ripublica Macedonia ditu Araţili, Vărgăria.
Atlasul easti arodlu a născăntoru niacumtinati cercetări di terenu adrati di specialişti kiro di patru dechenii ş-cama, ahurhinda cu anlu 1967, a deapoa sutili di hărţă lingvistiţi adrati acaţă tu isapi tută aria gheografică sud-dunăreană iu să zburaşti tru aestu kiro dialectulu armânescu.
Lucrarea ari la thimelliu unu şingiru di 61 di localităţ (32 tru Gărţie, 12 tru Arbinuşie, 9 tru Ripublica Macedonia ditu Araţili, 8 tru Vărgărie), tu cathi ună ditu aestea specialiştilli lucrară cu un chestionaru ţi ari 2.543 di antribări.
Ufilisearea-a aliştei tehni faţi di căbili, aestă turlie, compararea-a materialui dialectalu armânescu cu aţelu ţi easti tru atlasili reghionali a dialectului dacoromânu, scuţănda tu videală unitatea-a limbăllei română ţi să zburaşti tu nordulu şi tru sudlu a Dunăllei, tu statili balcaniţi.
Volumlu II acaţă tu isapi tutu materialu adunatu pi terenu, yilipsitu pi hărţă lingvistiţi şi tru listi cu materialu nicartografiatu deadunu şi cu noti, tră antribărli 463 – 896 ditu chestionaru, capitli: Familia, Casa, Avlia. Andicra di alti atlasi, materialu ditu hărţăli lingvistiţi easti yilipsitu şi pritu listi cari suntu deadunu cu hărţăli.
Atlaslu lingvisticu a dialectului armânescu easti un progresu importantu şi tru dumenea ali geografie lingvistică, di itia că da izini, tră prota oară, delimitarea-a graiurloru a armânăllei tru perspectivă spaţială, lucru ţi nu s-veadi tru lucrărli di ma ninti di dialectologhie. Neise, tră localităţli anchetati autorllii scot tu videală, tru capitolu Dati tră localităţ, informaţii mutrinda apartenenţa-a aţiloru ţi zburăscu dialectulu armânescu tră aesti fălcări/ grupuri: grămusteanu, pindeanu, fărşerotu, graboveanu, gopeşeanu, muluvişteanu, scoati tu migdani Academia.
Prof. Nicolae Saramandu easti membru corespondentu ali Academie Română, a deapoa Manuela Nevaci easti cercetătoru ştiinţific I la Institutlu di Lingvistică Iorgu Iordan – Alexandru Rosetti.
Date: 2021-05-05
Autoru: AGERPRES
Armânipsearea: Pareia redacţională armâneascâ di la RRI
