Achicâseari România – Uniunea Europeanâ
Andamusiţ sum zboarâli “Provocărli a Europâl’ei nu aproachi amânari”, năii comisari europen’i ş-ahurhirâ mandatlu, eforturli a executivlui Junker imnânda câtâ protili borgi ţi ş-li luă: criştearea ali icunumii şi a locurilor di lucru tu vâsâliili ali Uniuni Europeanâ, meatri cama susto mutrinda imigraţia şi cama multâ coerenţâ tu politica externâ şi di sicuritati.
Corina Cristea, 04.11.2014, 12:33
Scupolu aluştor meatri: apruchiarea a pistusinâl’ei a cetăţen’ilor tu construcţia europeanâ cu 28 di vâsâlii. România, ţi adarâ parti dit Uniunea Europeanâ dit anlu 2007, va s-bagâ mâna ti agiutor tu ţi mutreaşti apruchirea a scupadzlor a năilor formuli di turlii legislativâ di Bruxelles, prit activitatea a comisarlui ti politiţ regionali, Corina Creţu. Portofoliul – unlu dit nai mărli, ma s-mutrim prit prisma a pâradzlor daţ dit fonduri europeani – ari angâtan di aproapea 352 di miliardi di euro, pâradz di investit tu regiun’ili a vâsâliilor membri tu chirolu 2014 — 2020. Iara România s-aflâ prit statili ţi ai nai ma marli interes s-l’i-a ahtări fonduri.
Ti aţea, s-poati, Corina Creţu avut prota andamusi dit mandatlu a ei cu Eugen Teodorovici, ministrul român a Fondurilor Europeani, furn’ii cu cari doil’ii hâbârisirâ năi nomuri di finanţari ti amintatiţli a personalului di cumândiseari dit cadrul a proiectilor.
La câftarea a Bucureştiului, Comisia Europeanâ apruchie s-alâxeascâ programlu operaţional ti chirolu 2007 – 2013, ca amintatiţli aţilor dit sistemlu di luari a pâradzlor europen’i s-agiungâ s-hibâ eligibili şi s-hibâ daţ nâpoi 100% di executivlu comunitar.
Comisia Europeanâ va s-pâlteascâ aesti amintatiţi tu cadrul a unâl’ei schemâ ţi caftâ s-da curagiu ti performanţâ, naua turlii di evaluari lipsinda s-hibâ bâgatâ tu practico di la 1 di Yinaru. Andamusea di Bruxelles fu ţentratâ ş-pi andridzearea mutrinda ahurhita a achicâsearâl’ei di parteneriat cu România, ţi easti aştiptatâ Viniri, Bucureşti, anamisa di comisarlu Corina Creţu, cari va s-aspunâ turlia cum va s-hibâ ufilisiţ pâradzl’ii europen’i structurali şi di investiţii tu yinitorl’ii an’i.
Ministrul Eugen Teodorovici: Avui unâ moaubeti multu bunâ, di agiutor ti noi, ca vâsâlii, ta s-hibâ încl’isu aţel di tora cadru finanţiar la un nivel cât ma mari anlu ţi yini, şi caftu s-dzâc, s-bag acţentul nica unâ oarâ pi nivelul di 80% ti aţel di tora cadru finanţiar. Easti 44% azâ ca nivel di absorbţii. Am nâdia că România, anlu ţi yini, poati s-încl’idâ aţel di tora cadru finanţiar la un nivel cât ma analtu.”
Tu minduita ali Corina Creţu, Comisia Europeanâ aproachi ca hiindaei excepţionalâ crişterea a ratâl’ei di absorbţii dit Românii, di la 4% tu anlu 2012, la cama di 40% tu 2014, la aestu lucru hiindalor adâvgati şi reformili ţi li adră Bucureştiul tu aeşţâ dit soni an’i.
