Poiana Braşov
Vă călisimu Poiana Braşov, aclo iu stămăna ţi tricu eara ndreaptă a daua daua competiție di mari anvergură di estanu, SES CUP 2021
Ana-Maria Cononovici, 22.03.2021, 17:22
Tu ună hăvaie mplină di prusupidi şi testi Covid, ună staţiuni ditu România ş-băneadză, dupu kirolu di tora, normalitatea. Aşi, vă călisimu Poiana Braşov, iu tută stămăna ţi tricu eara ndreaptă a daua competiție di mari anvergură di estanu, SES CUP 2021, cu patru dzăli di concursu. Concursulu adusi la startu un numiru di aproapea 80 di sportivi ditu Liban, Lituania, Vărgăria, Bosna și Herțegovina, Slovacia, Ungaria si România, numirlu hiinda ma ñicu cumu eara arada di itia a condițiilor băgati di pandemie. Poiana Braşov easti nicukira a aiştei competiţie di itia-a capacitățloru a llei organizatoriţi, ama și a infrastructurăllei competiționalei pi un analtu livelu ţi poati s-u bagă la dispoziție.
Poiana Braşov easti ună staţiune di top şi aesta di itia că easti nai ma veaclle staţiuni di schi ditu văsilie, avânda aestu statut di un secolu ş-cama, staţiuni ţi nica ditu 1909 eara nicukira a protăllei competiţie di schi ditu România. Cu numa ghirmană Schulearau, Poiana Braşov faţi parti ditu giudeţlu Braşov.
Ditu istoriclu a competiţiilor disvărtiti aoa, aduţemu aminti că tru 1951, s-ţănu Universiada di iarnă, lucru di mari simasie căţe eara adratu protlu teleferic, s-adrară znueri a pârtiilor. Un altu momentu di mari simasie fu reprezentat di Festivalu olimpic a tiniramillei europeană, ditu 2013, cându s-lărdziră diznău pârtiile, aestă turlie s-agiumsi la un domeniu schiabilu di 80 di ictări, s-adrară năi znueri, s-adrară modernizări la instalaţiile di transport pi hiru şi, nai ma importantu, s-adrară tunuri di neauă, ţi lucreadz4 pi tutu kirolu a sezonlui araţi. Ase, Poiana Braşov agiumsi goala staţiune ditu văsilie cari ari tunuri di neauă ţi lucreadză tutu kirolu a sezonlui di iarnă. Aoa poati să s-facă skiearea tru buni condiţii, nica di anda tempearatura easti negativă şi nu easti ananghi s-da neaua di ndzeană.
Tu staţiunea Poiana Braşov ari 12 pârtii cu gradi diferiti di dificultati. Ti aţelli ţi suntu tu ahurhită cu sporturli di iarnă nai ma uidisitu suntu pârtiile Bradul şi Stadion. Schiorllii ică snowboard-erllii experimentaţi potu si s-hărsească di Pârtia-a Luplui, Drumul Roşu, Slalom, Subteleferic şi Pârtia Ruiului. Şculia di schi ditu Poiana Braşov ari ună adeti di 40 di añi, ari andrepţă aproapea 80 di instructori di schi şi 40 ti snowboard, tuţ calificaţ uidisitu cu normili internaţionali şi afiliaţ internaţional şi cu zburari tu limba ghirmană şi engleză.
Vlad, un tiniru instructor di schi, nă spusi căţe ti bună easti s-yinimu aoa tră schieari: “Di itia că easti nai cama bună staţiune ditu văsilie ditu videala administrativă şi di itia că easti tu inima ali Transilvanie. Tuti pârtiile suntu practicabili tu aestă oară, peisajlu easti ti anami, avem ună dzuuă sirină şi mplină di harauă!”
Tut Poiana Braşov va s-aflămu cazare la standardi analti, ţentre SPA, ţentru di divertismentu, pârtii ti darea cu sanca, dar şi un patinoaru di dimensiuni olimpiţi.
Vlad, instructoru di schi tu Poiana Braşov nă feaţi ună cllimari: “Vă aştiptăm la schi tu Poiana Braşov, pârtiile suntu ti anami, kirolu nu să spuni mplinu di musuteaţă !”
Poiana Braşov organizeadză nica di di trei ani dauă competiţii internaţionali: FIS Children Trophy și Poiana Brașov SES CUP, reprezentânda ună nauă şansă ti schiulu alpin ditu văsilia a noastră.
Autoru:Ana Maria-Cononovici
Armânipsearea: Taşcu Lala
