Prima Doamnă a SUA – la București

Jill Biden, Prima Doamnă a Statelor Unite, tru România,

Mariana Chiriță, 08.05.2022, 12:35

Jill Biden, nicukira a prezidintului american Joe Biden, eara vinită tru România. Prima Doamnă avu, București, andamasi cu membri a Guvernului, cu personalu a Ambasadăllei americană, cu lucrătorlii cilăstisitori tru acţiuni di agiutor uminitar, cum și cu profesorllii cari lli-agiută cilimeanilli ucraineni arifugaţ s’integreadză tru un mediu școlar stabil și sigur.

Prima Doamnă fu aştiptată, la Cotroceni, di prezidentulu Klaus Iohannis şi nicukira a lui, Carmen. Jill Biden şi Carmen Iohannis vizitară ună şcoală publică di Bucureşti, iu sunt aprukeaţ cu şidearea cilimeanilli ucraineni arifugaţ, cum şi mame ucrainene. Jill Biden lă spusi a mamilor ditu Ucraina că suntu ti ciudie, și alăvdă populu român: „Voi hiţ eroi!” și ălli haristusi a „Primăllei Doamnă a Româniillei di itia că aştiptă tuţ aeşţă oamiñi. Oamiñilli a dumniillei a voastră suntu ti anami”.

„Vă pricunuoscu multu di multu, că vă feaţitu kiro şi feaţitu gaereti s’nă videţ. Noi daama spusimu vreari ti americani şi himu hărioşi că nă asiguripsiţ securitatea. Bănămu un kiro greu şi tru ună catandisi multu apreasă, ţi aţea easti multu importantu s’himu adunaţ stogu. Vă haristusescu multu di multu tră aestă oportunitate, tră aţea că vinitu deadunu cu noi, nă adusitu nădie şi avem sentimentul că putem s’avemu pistusini tru dumnilleavoastră. Easti multu important tră noi tuţ, emu ti soţlli ucraineni, emu tră noi”, declară Carmen Iohannis.

Mamili ditu Ucraina lă exighisiră a aţiloru dauă doamne griutăţle pritu cari tricură di la ahuhrita a polimlui până agiumsiră tru România, şi zburără ti agiutorlu aprukeatu di partea a popului român.

Carmen Iohannis dimăndă a popului ucrainean că poate s’aibă pistusini tu agiutorlu ali Românie: „Vă vremu, hiţ soţlli a noştri. Himu aoa tra s’triţeţ ma lişoru pritu aestu kindinu şi vrem cadealihea s’adrămu tut ţi putem tra s’vă ţănemu tu sigurlăki”.

Ună di profesoare exighisi că la școala iu suntu aştiptaţ cu şidearea fu andreptu unu locu educaţional tră cilimeañilli ucraineni.

Easti zborlu ti unu proiectu ma lărguriu, ţi ari scupolu s’da agiutoru financiar, cazari şi yitripseari medicală a mamilor.



„Proiectul a meu vini di itia a frixillei. Mindueamu maş cum s’ñi-ascapu cilimeanlu. Haristusimu a popului român tră atea că fu ningă noi, nă agiută ahătu multu. Feaţiră ahătu multu voluntariat, că niţi România nu s’aştipta că pot s’hibă ahătu buñi oaspiţ cu aştiptarea. Vidzumu aeşti cilimeañi cari suntu tru unu locu sigur. (…) Voi s’haristusescu a popului român tră atea ţi feaţi tră noi”, pirmitusi ună altă profesoară ucraineană.



Ună altă mulleari ditu Ucraina declară că fu ciudusită, neise pi ună turlie pozitivă ti purtaticlu şi aştiptarea di cari ea şi cilimeanilli a llei avură parti tru România.



„Ari nădie. Easti tut ţi avemu ananghi„, adăvgă Jill Bidin.



Jill Biden agiumsi tru România viniri. Tru prota dzuua a vizităllei a llei, ea s-adună cu militarllii americani si di la NATO ditu Baza Mihail Kogălniceanu.

Vizita tru văsilia a noastră easti parte a unei voltă di patru dzăli pi cari Prima Doamnă u faţi tru România şi Slovacia tră s’cundilleadză angajamentul SUA tră arifugaţlli ucraineni. Scupolu a voltăllei tru ateali dauă state easti „tra s’treacă Dzuua a Dadăllei cu dadi şi cilimeañi ucraineni cari vidzură zori tra s’fugă ditu casili a loru di itia a polimlui al Putin”, angrăpsi nicukira a prezidentului american, pe Twitter.

Vizita a primăllei doamnă a SUA tru România yini ti ma pţănu di doi meşi, după aţea a viţeprezidintului american, Kamala Harris.

Autoru: Mariana Chiriţă

Armânipsearea: Taşcu Lala