Killnet versus Anonymous
România, idyea cumu alti state ditu UE şi NATO, fu ţinta a născăntor atacuri ţibernetiţi fspti di ună parei pro-rusă.
Ştefan Stoica, 02.05.2022, 17:33
Nu faţi victime umane şi nu nsimneadză fănicadz di turlia a aţiloru fapti di askirladzlli ruşi tru Ucraina, nu aspardzi infrastructura. Easti ună altă turlie di polimu, invizibil şi fără impactu emoţionalu, ama cu miză mare tru actuala eră a tehnologiillei. Faţi parte ditu aţea ţi s’clleamă conflictul hibrid şi nkiseaşti cu atacuri ţibernetiţi. Un ahtari atac zñiipsi, ti şcurtu kiro, aprindu dumănică, pagina di internet a nai ma marilui aeroportu ditu România, Otopeni. Şi nu fu protlu. Serviciul di Telecomunicaţii Speciale di la Bucureşti avea ambudyiusită, ma ninti, ñilli di ahtări atacuri tru dauli dzăli ditu soni, lansate di pareia pro-rusă Killnet contra a site-urilor a născăntoru importante instituţii cum Guvernul, Ministerul Apărării, Poliţia di Frontieră, işişi Directoratul Naţional di Securitate Cibernetică, principala structură di apandasi ti ahtări incidente, şi Poliţia Română. Ţinte fură şi instituţii publice ditu Republica Moldova, viţină cu Româniia şi Ucraina, cum şi ditu văsilii ale Uniunii Europene şi NATO.
Directoratul Naţional di Securitate Cibernetică feaţi timbihi că loară silă atacurli ţibernetiţi propagate pe email ică platforme di mesagerie di aţelli di la Killnet. Un idyea avertismentu vini şi ditu partea a Serviciului Român di Informaţii. Atacatorllii pitrecu mesaje pe email, WhatsApp, Signal, Telegram ică Messenger, cundillinda că suntu ună persoană di pitipseari tra s’căndăsească victimele s’divulgă informaţii confidenţiale, date personale ică s’facă acţiuni cari pot s’da izini a atacatorlor priloarea controlu tru infrastructura ică a născăntoru dispozitive informatiţi. Hackerllii ufilisescu nica şi adrese di email ică conturi di ufilisitor falsificate ca hiinda a născăntoru instituţii publiţi ică organizaţii cunuscute ditu România. Experţălli fac urminie a ufilisitorloru s’nu da cali a născăntor căftări urgente, ca ti ciudie spusi şi cari iesu tu videală ca suntu viniti di la unu izvuru di pistipseari, cari includ linkuri ică ataşamente cari fură căftati. Idyili meatri di aveari ngătanu lipseaşti s’hibă tiñisiti şi cându yini zborlu di accesarea link-urilor ică ataşamentelor pitricuti pritu mesaje di turlia SMS, WhatsApp ică Telegram, atacatorlli ufilisinda adrese di mail idyea cu a instituţiilor ditu România.
Ca apandisi la atacurli a hackerilor ruşi la adresa a născăntoru instituţii româneşti, gruparea Anonymous România dimăndă că atacă şi ambudyiusi site-ul a sistemului unificat a achiziţiilor ditu Rusia, cari fu nifuncţional kiro di dauă dzăli. „Ankisimu un contraatac maş tra s’lă spunemu că văsilia a noastră nu easti niagiutată. Nu avemu naeti s’dămu apandisi la alti atacuri, tra s’nu apandaseasca cu alti”, declară hackerii români a unlui postu privat. Anonymus spuni că acționă contra ali Rusiei la ndauă dzăli di la aputrusearea ali Ucraină, iara ţintili a lui principale suntu serviţiile di achiziții, licitații, imobiliare, terenuri, tra s’aducă zñii financiare a statlui agresor.
Autor: Stefan Stoica
Armânipsearia: Taşcu Lala
