Dolheşti
Casa Ana, Casa Elena, Casa Bărculescu, Casa-a păpăniloru di ningă păduri ică casi cu numili a familiiloru nicukiri suntu muşuteţli di amprotusa a unălei hoară ţi ş-pripusi nu di multu kiro să-şi facă promovarea turistică ea işiş: Dolheşti.
Ana-Maria Cononovici, 08.05.2021, 19:02
Casa Ana, Casa Elena, Casa Bărculescu, Casa-a păpăniloru di ningă păduri ică casi cu numili a familiiloru nicukiri suntu muşuteţli di amprotusa a unălei hoară ţi ş-pripusi nu di multu kiro să-şi facă promovarea turistică ea işiş: Dolheşti. Himu tu nordulu a văsiliillei, tru judeţlu Suceava, aclo iu după anlu 2017, bănătorlli ahurhiră să scoatătu videală caracteristiţli multu muşeati ţi li ari aestă parti di locu: vatra-a hoarăllei, bănătorlli di pritu hori cu adetli şi zărconili ţi li ţănu cumu eara tu kirolu di ma ninti. Tutu atumtea fu thimilliusită Asociația di Promovari Valea-a Șomuzlui, di Mirela Nechita, cari deadunu cu alţă bănători băgară Dolheștiul pi harta turistică ali Românie.
Turiștilli cari dănăsescu tru Dolheștilli N’iţ potu s-veadă băsearica ditu secolu XV-ţi, nicukirati huryitesti, moara veaclle di 100 di añi, ş-cma muzeulu cu lucri a domnului Cărăbuș, potu s-ducă acasă la masturi, potu s-nkisească priimnarea pritu păduri, pot s-acaţă calea pi traseele ditu Protlu Polimu Mondialu, potu s-llia parti la atelieri di măyirgirie, di cuseari ică di olăritu. Aoa pot s-hibă ndreapti vizite la masturi. Poati s-hibă vizitatu cujucarlu a hoarăllei, multu dişcllisu tra să spună tuti hopili a lucărlui a lui, di la kealea ţi easti adusă niaryăsită, până la produslu di bitisită. Tutunăoară, hirarlu a hoarăllei easti un artizan a herlui şi ufiliseaşti hălăţ cari eara ufilisiti şi di străpaplu a lui. Nica pot s-hibă ndreapti viziti la stani, la apicultor, tru isnăhili di tăseari, di cuseari ica strañe tradiţionale.
Tută Valea-a Şomuzlui easti anvărligată di păduri di foioase, cari ahurhinda cu meslu apriiuru până tru brumaru spunu unu cadealihea spectacol di hromă, di irine şi isihie.
Mirela Nechita, ditu partea-a Asociaţiillei ti promovari Valea a Şomuzului, Dolheşti, Suceava, nă spusi căte poati să s-hărsească turistul ţi yini aoa:
Ningă hoara-a noastă, avemu căsăbălu Fălticeni, cari-i la 20 di kilomeatri şi tru cari aflămu multi obiectivi culturale şi istoriţi ti videari, avem Muzeulu a sculptorlui Ion Irimescu (n.r. 27.02.1903- 29.10.2005, Fălticeni, sculptor român, profesoru și membru al Academie Română), Galeria-a Oamiñiloru cu Anami, Muzeulu a Apiloru Mihai Băcescu, Casa memorială Mihail Sadoveanu. La noi nhoară avemu băsearica construită di Hatmanlu Şendrea, cari fu cumnatlu al Ştefan atelu Marli. Nu multu alargu easti Mănăstirlu Probota, ctitorie al Petru Rareş. La noi nhoară nica suntu tru păduri tranşeele ditu Protlu Polimu Mondial, cu ketari ngrăpsiti di askirladz. Easti un loc iu putem s-videmu dovedzli a polimlui cari armasirâ până tru dzălili a noastri. La aproapea 40 di kilometri di Dolheşti, easti căsăbălu Suceava, cu ghini cunuscutili obiectivi turistiţi ţitati, muzeu, Muzeulu a Hoarăllei Bucovineană.”
A deapoa di itia că anda va s-agiundzeţ aoa va s-hit astiptaţ tru casili a bănătorloru, dealihea şi mâcarea va s-hibă di adeti, după reţeti ditu veclliulu kiro, di la ciurbadz acriţ cu chişleacu (lapti acătatu cu mărcatu), bureţ şi alti turlii di bureţ di păduri, ndrepti pi lenu turlii di formi, tochituri, piti şi cuzunaţ, zacuscă şi câte şi multi alti buni măcări ti anami di ţă aduţi aminti ti casa-a maiillei, ditu pirmituseri.
Cara va nidzeţ vizită tu kirolu a sărbătorloru, tentaţiili va s-hibă surprinzătoari, după cum nă spusi Mirela Nechita, ditu partea ali Asociaţie tră promovari Valea-a Şomuzlui, Dolheşti, Suceava:
“Putem s-adrămu cuzunat, adrămu pasca cu casu şi pasca cu smântână. Avem ună reţetă a noastră mulu nostimă: la pasca cu caşu maia a mea băga slăninuţă afumată tălliată cumăţ ñiţ. Minteaşti caşlu di văţ cu niheamă caşu ardeari, ălu tindi pi blatlu di pască şi pisupră băga cumătici di slăninuţă afumată.”
Aoa va vă hărsiţ cu căntiţli a pareiillei Străjerlli di Dolheştilli N’iţ”, cilimeanilli ţi cântă şi gioacă şi cari au un programu multu muşeatu cu adeţ şi zărcoñi, tuti clirunumsiti şi scoasi tu videală, tru actualitati.
Autoru: Ana-Maria Cononovici
Armânipsearea: Taşcu Lala
