Cooperare româno-americană
Șeflu a diplomațiillei române, Bogdan Aurescu, şi omologlu a lui american, Antony Blinken, avură muabeti pritu tilefunu, tru contextul polimlui ali Rusie contra ali Ucraină.
Mihai Pelin, 08.03.2023, 18:30
Ministrul român di Externe, Bogdan Aurescu, şi secretarlu di stat american, Antony Blinken, avură ună muabeti telefonică pi teme cu sinferu di prota thesu ti eres prioritar tră Parteneriatlu Strategic bilateral, tru contextul a polimlui ali Rusie contra Ucrainăllei şi a gaeretloru di combatere a zñiiloru aluştui. Dialogul s’ţănu şi cu arastea ti ndridzeari a Aţillei di a opta andamasi a Dialogului Strategic anamisa di România-SUA, cari va s’ţănă tru marţu, Bucureşti.
Tru contextul că s’umplu unu an di la nkisearea di cătră Rusia a polimlui di agresiune contra ali Ucraină, elli zburără ti efectele globale ahăndoasi a aluştui, cum şi gaereţ comune tră contracararea aluştoru. Şeflu a diplomaţiillei române feaţi ună traţiri tru revistă a agiutorlui multu nsimnatu şi multidimensional ţi ălu deadi România di la ahurhita a polimlui tră aestu cratu.
Tu arada a lui, secretarul di stat al SUA haristusi a ministrului Aurescu tră agiutorlu concret, multu nsimnatu şi esenţial ţi ălu deadi România ali Ucraină.
Tru planul securitatillei regionale, aţelli doi oficiali scoasiră tru videală miza tra s’ducă ma largu anvărtuşearea coerente şi consistentă a Flancului Estic al NATO, iara Bogdan Aurescu cundille aprecierea tră angajamentul SUA tră apărarea teritoriului Aliat, inclusiv tru reghiunea ali Amarea Lae şi tru România, exprimat inclusiv cu ucazea ali andamasi ţănută Bucureşti 9 ditu meslu şcurtu di la Varşovia.
Aţelli doi şefi a diplomaţiilor zburără, tutunăoară ti căbilea mutrinda anvărtuşearea a rezilienţăllei tru regiunea ali Amarea Lae pritu ună mutrită strategică cari s’asiguripsească, pi un planu durabilu, caracterlu liber, sigura şi prucupsitu ali Amarea Lae şi să’lli anvărtuşeadză statutlu di rută comercială şi energetică majoră.
Di altă parte, Bogdan Aurescu cundille impactul major pi cari polimlu di fuvirseari ali Rusiei contra ali Ucraină lu-ari ti Ripublica Moldova şi adusi aminti diznău andruparea susta ali României, continuuă şi nicondiţionată, tră Ripublica Moldova, tră anvărtuşearea rezilienţăllei şi securitatillei aliştei şi ti imnaticlu a llei european. Tutunăoară, el năpoi adusi aminti ti importanţa prioritară mutrinda acăţarea tu isapi ali Românie tru Programul Visa Waiver a SUA. Tru contextul provocărlor di securitate ditu reghiune, România va tra s’ancupără un batalion di tancuri americane Abrams, cari ari, di raradă, 54 di ahtări vehicule blindate. Apofasea va s’hibă niintată ti vulusearea tru Parlamentu.
Experțăllii militari lugursescu că aestu tancu ditu treilu bărnu easti unu multu hăirlăticu, păhălu a lui nkisinda di la 10 milioane di dolari. Reprezentațăllii MApN sburără şi ti achiziții tru domeniul naval. Tutunăoară, s’estimeadză că tru 2024 va s’hibă livrate tuti avioanele F-16, după ţi, anlu tricut, fu simnat contractul di achiziţie ti 32 di ahtări aeronave ditu Norvegia.
Tru aestu kiro, Forțele Aeriene Române au tru dotare 17 avioane F-16, ancupărate ditu Portugalia și modernizate cu agiutorul SUA, ama și aparate MIG21 LanceR, ma veclli, di proveniență sovietică.
Autoru: Mihai Pelin
Armânipsearea: Taşcu Lala
