Azuga

Adză vă călisimu svă hărsiţ di schi ică snowboard la Azuga, una di nai ma vecllili staţiuni di schi di la noi ditu văsilie, situată pi Valea a Prahovăllei.

Ana-Maria Cononovici, 20.02.2022, 17:41

Adză vă călisimu s’vă hărsiţ di schi ică snowboard la Azuga, una di nai ma vecllili staţiuni di schi di la noi ditu văsilie, situată pi Valea a Prahovăllei, anamisa di Buşteni şi Predeal, tru giudețul Prahova. Dizvoltată la ună anălţimi medie di 1.000 di metri, tru extremitatea nordică a giudeţlui Prahova, la 147 di km andicra di Bucureşti, Azuga căliseaşti la agroturismu şi sporturi di iarnă.

Tru Azuga, ari pârtii omologate internaţional, ti ahurhitori şi ti avansaţ, cum şi instalaţie di adrari neaua, aesta contribuinda ca catastisea’a a pârtiilor s’hibă mulu bună. Ari, dialihea, şi instalaţii di transport pi hiru, di la bandă ti ahurhitori, la teleschiuri şi telegondolă, cari leagă baza staţiunillei cu kipita Sorica.

Constantin Matei, monitor di schi, nă feaţi ună căliseari: “Vă aştiptăm la Azuga. Tru perioada aesta easti soare pi pârtii, nai ma ghini s’faţi schi pi pârtia Sorica, iu avem şi tunuri di neauă. Avem 7 pârtii di ski cu ună lundzime totală di 7 kilometri şi diferenţă di nivel di până la 500 di metri. Pârtiile sunt ndreapti cu instalații di cablu, telegondolă şi trei teleschiuri, baby-schi şi bandă rulantă, ti ahurhitori. Avem centre di loari cu niki di echipament sportiv, iu puteţ s’căftaţ şi monitori di schi, cara nu nidzeţ multi ori la schi şi aveţ ananghi di candaseari. Nu să schiadză tru nocturnă tru aestu sezon, pi niţi una ditu pârtii.”

Azuga ndreadzi nai ma mari domeniu schiabil tră ahurhitori ditu văsilie. Ama, agiumţă pi kipita Sorica, puteţ s’vidiţ ună muşeată perspectivă cătă Cruţea Caraimanului, monument comemorativ tră eroii români ditu Primul polimu mondial şi kipita Coştila, ditu Munţălli Bucegi, ama şi cătă Munţălli a Baiului. Di aoa, poate s’dipună pi schiuri, ică pi pârtia Sorica cu ună lundzime di aproximativ 2 km şi giumitate, ică pi pârtia Cazacu, cari easti niheamă ma lungă, dauli cu un grad di dificultate mari şi pi un versant, ună pârtie di 100 di metri, deservită di un teleschi, aesta avânda un grad ma ñicu di dificultate. Diferenţa di nivel easti di aproximativ 600 di meatri. Tru viţinătatea a pârtiillei Cazacu, ari ună pârtie pi cari poate s’facă şi schi fond şi schi randone. Tutunăoară, puteţ s’vă priimnaţ cu ATV-ul ică cu snowmobilu.

Un hopă la Azuga s’caftă adăvgănda videarea păstrăvăriillei, cum şi a cramăllei Rhein. Crama dateadză ditu 1892, ditu perioada di dizvoltare a căsăbălui-staţiune aflat la maş ndoi km la sud, Sinaia, iu s’avea anălţată Pălatea Peleş a fumeaiillei văsilikească, ama şi multe vile şi hoteluri. Ditu 2003 crama di la Azuga intră tru circuitul touristic. Vizitatorllii pot s’veadă aoa tuti etapile di adrari a yinlui spumant şi putânda s’viziteadza ñicul muzeu ţi părăstiseaşti mehanii şi caduri ditu ahurhita a emburlăkillei ţi u făţea familia Rhein, furnizor al Casăllei Regală ali Românie.

Cu nadia că va s’apăndăsiţ la călisearea a noastră la schi şi discurmari la Azuga, vă aştiptăm şi data yinitoare cu ună nauă distinaţie.

Autoru: Ana-Maria Cononovici

Armânipsearia: Taşcu Lala