Parteneriat strategic româno-american
Ministrul român ali Apărari, Angel Tîlvăr, faţi tu aesti dzăli ună vizită tru Statele Unite ali Americă.
Corina Cristea, 31.03.2023, 13:23
Deadunu cu şeflu a Statlui Major, gheneralu Daniel Petrescu, şi alţă oficiali di București, ministrul român ali Apărari Naţională, Angel Tîlvăr, faţi tru aesti dzăli ună vizită tru Statele Unite ale Americii. Ună vizită cu ună agendă mplină, simfunu cu programlu dimăndatu di Ambasada României tru SUA, cari includi muabeţ la Washington cu şeflu a Statilor Majore Andămusiti ale Forţelor Armate ale SUA, cum şi la Casa Albă – Consiliul Securităţii Naţionale. Ama și andamasi cu prezidinţălli a Comisiilor tră Forţe Armate ditu Senatul SUA şi Camera Reprezentanţilor, cum şi cu reprezentanţă ali industriei americane di apărare şi ditu mediul di reflecţie strategică şi expertiză.
Nu di tu soni, cu furñia a vizităllei tru SUA, delegaţia română va s’nsimneadză yiurtusearea 30 di añi di la stabilirea parteneriatlui anamisa di Forţele Armate Române şi Garda Naţională Alabama. Oficialli români va s’ducă tu statul Alabama, iu, anamisa di 2 şi 4 apriliu, va s’aibă andamasi cu guvernatorul a statului, conduţirea a Gardăllei Naţionale Alabama, cum şi cu legislativul şi mediile locale.
Vai nai ma importantă ditu andamasi s-ţănu gioi. Ministrul Angel Tîlvăr avu muabeţ cu secretarul american ali apărari, Lloyd Austin, tru cadrul a curi, analtul oficial american spusi că Parteneriatul strategic anamisa di Statele Unite şi România easti ma vărtosu ca vărnăoară. Uidisitu cu un comunicat a Pentagonlui, secretarlu ali apărari Austin salută ligătura ti anami anamisa di armatili a aţiloru dauă văsilii.
Purtătorlu di zboru a Pentagonului, genearalul Pat Ryder, ti muabeţli Austin-Tîlvăr: “Secretarlu ali apărari Austin haristusi ali României tră aţea că fu nicukirlu a ñilli di askirladz americani şi aliaţ, cu scupolu ti apărari flancului estic al NATO, şi tră rolu di lider ali Românie tru regiunea ali Amarea Lae. Aţelli doi lideri salutară, tutunăoară yiurtusearea a 30 di ani a parteneriatului di stat ali Românie cu Garda Naţională Alabama. Secretarlu ali apărari Austin aşteaptă cu niarăvdari năi andamasi şi oportunităţ ta s’lucreadză cu aliaţlli români.”
Tru ună conferință di presă, ghenearalu Ryder nica spusi că aţelli doi miniştri ali apărarii condamnară „polimlu sălbatic ali Rusie contra ali Ucraina”. Elli şi spusiră tu idyiulu kiro andrupămintul susta tră Ucraina. Secretarlu ali apărari Lloyd Austin spusi că invazia Rusiillei tru Ucraina easti ună fuvirseari tră securitatea regională, dimăndă corespondenta Radio România la Washington, iara ministrul român ali apărari, Angel Tîlvăr, spusi că prezidentulu Putin easti nai ma yilipsitoari şi directă fuvirseari tră securitatea europeană, euroatlantică şi reghională.
Aduţemu aminti că Parteneriatlu strategic anamisa di România și SUA fu lansat la 11 di alunaru 1997, cu furñia a vizităllei la București a liderlui di la Casa Albă, Bill Clinton, și di atumţea easti un sturu di thimelliu ali politică externă ali Românie.
Autoru: Corina Cristea
Armânipsearea: Taşcu Lala
