Trilaterală România – Republica Moldova – Ucraina

Caplu a diplomațiillei di București, Bogdan Aurescu, dimăndă că fu lansată Trilaterala România - Republica Moldova - Ucraina, la nivel di miniştri di Externe.

Mihai Pelin, 17.09.2022, 17:26

Caplu diplomației române, Bogdan Aurescu, lo parti, gioi, Odisa, la prima reuniune tru format trilateral a miniştrilor di Externe ditu România, Republica Moldova şi Ucraina, diadunu cu omologlu a lui di Chişinău, Nicu Popescu, şi atelu ucrainean, Dmytro Kuleba. La andamasi eara viniţ şi miniştrilli ali Energie, cum şi reprezentanţă a companiilor ditu domeniu ditu ateali trei state, căslisearea a aluştoru yilipsinda angajamentul strategic a aţiloru trei văsilii tra s’lucreadză diadunu tru aestu domeniu. Neise,s’akicăsiră ti simnarea a unlui Acord interguvernamental trilateral tra ss’da sila a interconectărilor tru domeniul a energiille ali Românie, Ucraină şi Republică Moldova.

Lansarea alustui format trilateral ari tru scupo anvărtuşearea a cooperarillei anamisa di aţeali trei văsilii viţini, emu tru contextul actual marcat di agresiunea paranomu, niprovocată şi niantimilleată ali Rusie contra ali Ucraina şi di crizili multidimensionale cari zñiipsescu Ucraina şi Ripublica Moldova, emu tru perspectiva ti andridzeari unu mecanism di dialog şi coordonare pi lungu kiro, mutrinda nica şi andruparea susta di cătră România a autorităţlor di Chişinău şi Kiev tru vedirea implementării reformelor necesare tru procesul di integrare europeană. Cu aestă furñie, caplu a diplomaţiilei române năpoi adusi aminti ti solidaritatea vărtoasă ali Românie cu populu ucrainean greu trăñipsitu şi aprecierea ahoryea tră curayilu şi eroismul ţi lu spusiră cetăţenii ucraineni.

Tru contextu, Bogdan Aurescu yilipsi multili misuri adoptate tru plan naţional tra s’agiută Ucraina, evocânda, tru aestă noimă, agiutorul umanitar datu a aţiloru cama di 2,3 milioane di arifugaţ ucraineni cari intrară tru România, cum şi eforturile a autorităților di la București tra s’agiută exporturile ucrainene di yipturi. El cundille că, di la diclanşarea a aputrusearillei aruse şi până tru aestă oară, aproapea 4 milioane tonuri fură exportate pritu România. Di altă parte, ministrul român di Externe sumlinie că Republica Moldova majoritar românofonă armâne statul viţin nai ma vărtosu zñiipsitu di agresiunea militară rusă tru Ucraina, yilipsinda faptul că România andrupă şi ma largu va s’andrupască, Chişinăul tru năstriţearea a aluştoru provocări fără preţedintu.

Aducănda aminti apofasea istorică a Consiliului European ditu cirişaru tra s’da statutlu di văsilii candidate la UE ti Ucraina şi Ripublica Moldova, obiectiv strategic tra cari România cilăstăsi cabaia multu şi apufusitu, ministrul Bogdan Aurescu năpoi adusi aminti ti angajamentul vărtosu tra s’agiută ateali dauă stati tru proţesul ali integrari europeană, emu tru cadru bilateral, prin agiutoru direct tra eforturile di reformă, emu năuntrulu ali Uniuni.

Autoru: Stefan Stoica

Armânipsearea: Taşcu Lala